Ambo nak ceghita antarabangsa sikit haghi ni, ho la hok oghe dok kata kito nak globalisasi, jadi ambo po nok ghoyak hok global getek la haghi ni.
Ni ceghita Segenting Kra. Oghe putih panggil "Isthmus of Kra". Kalu ghoyak basa oghe putih ni sedap de'ngar adik kakak dih? Bunyi mace kita ni bijak do'ah la, dok keneh?
Kalu de ko oghe kita gak "Segenting Kera", tak tahu la bakpo nama kera jadi nama segenting.
Buleh jadi masa tu banyak do'oh kera di kawase hute hok ada di situ, jadi demo ambik la sempena nama kera tu.
Buleh jadi juga oghe Siye (Siam) ni ke dia suka cegita "hanume (Hanuman) kera putih", jadi dia ambik nama hanume tu buat nama segenting tu.
Tapi kot mana pun nama kera jugak la.. ehehehe.
Demo tu dok ghoyak nak buat teruse (mace Teruse Suez, mace Teruse Panama la jugaknyaa..) lalu kot segenting tu weh, yak di tahun 1677 lagi. Maknanya buke benda baghu. Yo la, masa tu belum ada teknologi lagi. Lepah tu hile senyap dale gong gende.
Lepah pada tahun 1863, masa Burma jadi tanah jajahe oghe putih (Inggeris), ada lagi timbul ceghita teruse tu, tapi oghe putih takse buat, sebab dia takut jajahe Singapura dia jadi tak maju. Ho la, kalu de siap Teruse Segenting Kra tu gak, oghe tokse lalu doh la kot Singapura tu.
Tapi hok terbaru nya timbul ceghita Keraja'e China (RRC) nak buat pula Teruse Segenting Kra tu. Dia nak tanggung semua belanja. Keraja'e Siye (Thailand) tak payah bayar sa sen abuk, tapi sain surat kebenare jah, hok pitih tu oghe China bayar belaka. Ho sedap bu'nyi deh?
Adik kakak nak dengar lagi ko ceghita Segenting Kra ni?
0 ulasan:
Catat Ulasan